
ـ بسألك، تعرفي الكلام ده؟
رفعت عينيها إليه بصدمة.
ـ لا طبعًا! أنا أول مرة أشوف الكلام ده.
ـ متأكدة؟
تغيرت ملامحها.
ـ أيوه متأكدة.
ـ فيه واحد اسمه سامح كان هنا من شوية، وبيقول إنك اتواصلتي معاه علشان تشتري منه مستندات تخص الفاتورة.
تجمدت في مكانها.
سامح!
إذن هو الشخص نفسه الذي اتصل بها بالأمس.
ـ هو سامح ده اللي اتصل بيا امبارح؟
ضيق أدهم عينيه.
ـ اتصل بيكي إمتى؟
ـ امبارح، بعد ما حضرتك مشيت. اتصل على تليفون المكتب وقال إنه عايز يقابلني بخصوص أوراق تخص تدريبي، وأنا رفضت أقابله وقلت له يتواصل مع حضرتك.
ظل ينظر إليها.
ـ وليه مقولتليش إنه اتصل بيكي غير بعد ما سألتيه عن اسمه؟
ـ أنا قلت لحضرتك فورًا!
ـ أنا بسألك عن حاجة تانية. إنتِ قابلتيه قبل كده؟
ـ لا.
ـ ولا اتكلمتي معاه بره الشركة؟
ـ لا يا فندم.
أخذ الهاتف، وأعاد النظر إلى الصور.
ـ أمال إيه تفسير المحادثات دي؟
ارتبكت ليلى وهي تنظر إلى الشاشة مرة أخرى.
ـ دي مش محادثاتي، ومش رقمي أصلًا.
رفع عينيه إليها.
ـ إنتِ متأكدة إنك عارفة إنتِ بتقولي إيه؟
بدأ صوتها يرتجف رغم محاولتها السيطرة على نفسها.
ـ أيوه، أنا عمري ما طلبت من حد مستندات مقابل فلوس، ولا أعرف الراجل ده من الأساس.
نهض أدهم من مقعده، واتجه نحو النافذة.
ـ بصي يا ليلى، أنا مش بحب اللف والدوران، ومش بحب أكتشف إن حد بيشتغل معايا من ورا ضهري.
نهضت هي الأخرى.
ـ وأنا مش بلف ولا بدور يا فندم.
استدار إليها.
ـ خدي بالك من نبرة صوتك وإنتِ بتتكلمي معايا.
انخفضت عيناها للحظة، لكنها لم تتراجع.
ـ أنا آسفة لو صوتي علي، بس حضرتك بتتهمني بحاجة أنا معملتهاش.
اقترب من مكتبه، ووضع كفيه فوقه.
ـ أنا لسه متهمتكيش. أنا بس بحاول أفهم الحقيقة.
ـ وأنا قلت لحضرتك الحقيقة.
ـ والحقيقة مش بتتحدد بكلمتين يا آنسة ليلى.
شعرت بغصة في حلقها.
كانت تنتظر منه أن يستمع إليها، أن يتذكر أنها أخبرته بنفسها عن الظرف والرسائل، لكنها لم تجد في عينيه سوى الشك.
قالت بهدوء حاولت أن تتمسك به:
ـ طيب، راجع الرقم اللي في المحادثة، وراجع كاميرات الشركة، وشوف الراجل ده قابلني فين وإمتى. أنا معنديش مشكلة تتحقق من أي حاجة، بس مش من حق حد يلفقلي كلام وأنا أسكت.
ظل ينظر إليها.
كانت غاضبة، لكن غضبها لم يكن يشبه غضب الموظفين الذين يخشون العقاب؛ كان غضب إنسانة تشعر أن كرامتها أصبحت موضع شك.
أشار إلى المقعد.
ـ اقعدي.
ـ أنا أفضل واقفة.
اشتدت ملامحه.
ـ وأنا لما بقول اقعدي، يبقى تقعدي. إحنا في مكتب شغل، مش في نقاش مفتوح.
نظرت إليه لثوانٍ، ثم جلست بصمت.
عاد إلى مقعده والتقط الهاتف.
ـ هاتي رقم سامح اللي اتصل بيكي امبارح.
أخرجت هاتفها، وأعطته الرقم.
قارنه بالرقم الظاهر في المحادثة، ثم طلب من مدير الأمن التحقق منه.
بعد دقائق، جاءه الرد.
كان الرقم مختلفًا.
لكن ذلك لم يكن كافيًا لإثبات براءتها أو إدانتها.
أغلق المكالمة، ثم نظر إليها.
ـ لحد ما الموضوع يتضح، هتوقفي شغلك على ملف الفاتورة.
رفعت رأسها بسرعة.
ـ ليه يا فندم؟
ـ ده قرار إداري.
ـ بس أنا اللي بدأت المراجعة، وأنا أقرب واحدة عارفة تفاصيلها.
ـ وأنا مش هسمح إن حد يشتغل على ملف حساس بالشكل ده وفيه شبهة تضارب مصالح.
تألمت من كلماته.
ـ يعني حضرتك صدقته؟
نظر إليها بجمود.
ـ أنا مصدقتش حد. لكني مش هراهن على سمعة الشركة لمجرد إنك بتقولي إنك بريئة.
ابتلعت ليلى ريقها، ثم أومأت ببطء.
ـ مفهوم يا فندم.
حملت دفترها ونهضت.
وقبل أن تصل إلى الباب، أوقفها صوته.
ـ ليلى.
التفتت إليه.
ـ نعم؟
ـ متحاوليش تتواصلي مع سامح، ولا مع أي حد له علاقة بالموضوع. وأي حاجة تحصل تبلغيني بيها.
أجابته بنبرة خافتة:
ـ حاضر.
خرجت وأغلقت الباب خلفها بهدوء.
أما أدهم، فظل ينظر إلى المكان الذي كانت تجلس فيه.
لم يكن مقتنعًا تمامًا بما قاله سامح، لكن شيئًا داخله كان يرفض أن يصدق أن ليلى قد تخدعه.
وهذا الرفض نفسه أثار غضبه.
في الخارج…
جلست ليلى خلف مكتبها، تحاول استعادة تركيزها، لكن الكلمات ظلت تتردد في أذنيها.
«مش هراهن على سمعة الشركة لمجرد إنك بتقولي إنك بريئة.»
أغمضت عينيها للحظة.
كانت قد تحملت قسوته منذ أول يوم، وتقبلت حدته، بل وأحيانًا كانت تجد خلفها جانبًا آخر لا يظهره لأحد.
لكن أن يشك في أمانتها؟
ذلك كان أصعب مما توقعت.
اقتربت مريم منها.
ـ مالك يا ليلى؟ وشك مخطوف ليه؟
رفعت ليلى رأسها وابتسمت ابتسامة باهتة.
ـ مفيش، شوية إرهاق.
ـ إنتِ بتقولي مفيش كل ما تكوني مضايقة. أنا مش غريبة عنك.
ترددت ليلى، ثم قالت:
ـ فيه حد بيحاول يورطني في موضوع الفاتورة، وأدهم بيه بدأ يشك فيَّ.
اتسعت عينا مريم.
ـ يشك فيكي إزاي؟ إنتِ عملتي إيه؟
ـ ولا حاجة. فيه واحد جه قاله إني كنت عايزة أشتري منه مستندات، وعرض عليه محادثات مزيفة.
ـ وإنتِ سكتيله؟
ـ لا، قلت له الحقيقة.
هزت مريم رأسها بغضب.
ـ طب ما هو المفروض يعرف إنك مستحيل تعملي كده!
ابتسمت ليلى بحزن.
ـ مش كل الناس بتعرف تصدق يا مريم.
في تلك اللحظة، رن الهاتف الداخلي.
رفعت السماعة.
ـ مكتب أدهم بيه.
جاءها صوته الحازم:
ـ ابعتيلي ملف مواعيد الأسبوع الجاي.
ـ حاضر يا فندم.
ـ وليلى…
ـ أيوه؟
ـ عايز الملف منظم، مش ناقصني أخطاء النهارده.
أغمضت عينيها للحظة.
ـ حاضر.
أغلقت الخط، ثم التفتت إلى مريم.
ـ شايفة؟ حتى المواعيد بقت محتاجة تحقيق.
ضحكت مريم رغم قلقها، بينما عادت ليلى إلى عملها.
في مكتب أدهم…
كان يتصفح تقريرًا أرسله مدير الأمن، حين دخل عليه كريم.
ـ أدهم بيه، حضرتك طلبتني؟
أشار له بالجلوس.
ـ اقعد يا كريم. عايزك تراجعلي موضوع الفاتورة من أوله.
ـ حاضر يا فندم.
ـ وتحديدًا عايز أعرف مين كان عنده صلاحية الدخول على النظام، ومين قدر يغير البيانات، وأي شخص اتعامل مع الملف بعد مراجعة الآنسة ليلى.
فتح كريم دفتره وبدأ يدون.
ـ حاضر.
توقف أدهم لحظة، ثم سأله:
ـ إنت تعرف سامح؟
رفع كريم رأسه.
ـ سامح مين؟
ـ واحد اسمه سامح، جه الشركة النهارده.
فكر كريم قليلًا.
ـ الاسم مش غريب، بس مش قادر أحدد.
ـ لما تفتكر، تبلغني.
أومأ كريم، ثم خرج.
ظل أدهم يراجع التقرير، حتى توقفت عيناه عند اسم ظهر ضمن قائمة الأشخاص الذين كانت لهم صلاحية الوصول إلى الفاتورة.
حسام… مسؤول إدخال البيانات.
الشخص الذي كان من المفترض أن يكون في إجازة وقت اكتشاف التعديل.
ضغط أدهم على زر الاتصال.
ـ عايز حسام يجيلي بكرة الصبح.
في المساء…
كانت ليلى قد انتهت من ترتيب الأوراق، وحملت حقيبتها استعدادًا للمغادرة.
خرج أدهم من مكتبه، فوجدها تقف أمام مكتبها، تراجع شيئًا في دفترها.
ـ إنتِ لسه هنا؟
رفعت رأسها.
ـ كنت بخلص مواعيد بكرة يا فندم.
ـ خلصتي؟
ـ أيوه.
أومأ، ثم اتجه نحو المصعد.
كانت ليلى على وشك المغادرة في الاتجاه الآخر، لكنه توقف فجأة.
ـ ليلى.
التفتت.
ـ نعم؟
ـ استني.
عقدت حاجبيها.
ـ فيه حاجة يا فندم؟
نظر إلى ساعته.
ـ الوقت متأخر، والسواق لسه موجود. هتروحي معاه.
ترددت.
ـ مش لازم يا فندم، أنا هركب مواصلات.
نظر إليها بحدة.
ـ أنا مطلبتش رأيك في الموضوع. بقولك السواق هيوصلك.
ـ بس حضرتك…
قاطعها:
ـ ليلى، متخلينيش أكرر كلامي.
ـ وأنا بقول لحضرتك، أنا هتصرف، بعد إذن حضرتك.
قالتها وغادرت بينما هو ظل يتابعها بنظرة جامدة.
لم يكن يريدها أن تذهب وحدها، لكنه لم يكن مستعدًا للاعتراف بأن فكرة تعرضها لأي أذى أصبحت تثير داخله غضبًا لا يستطيع السيطرة عليه.
وفي اللحظة التي دخل فيها المصعد، وصلته رسالة من رقم مجهول.
فتحها.
كانت تحتوي على صورة لليلى تقف بجوار سيارة سوداء، وبجوارها رجل لم تظهر ملامحه بوضوح.
وتحت الصورة جملة واحدة:
«مش كل اللي بيبان بريء بيكون بريء يا أدهم بيه.»
تجمدت ملامحه.
كبر الصورة بأصابعه، وتأملها جيدًا.
ثم رفع هاتفه واتصل بمدير الأمن.
ـ عايز أعرف الصورة دي اتصورت إمتى وفين، وعايز أعرف مين الراجل اللي واقف جنبها.
صمت للحظة، قبل أن يضيف بصوت أكثر حدة:
ـ ومحدش يعرف إن الصورة وصلتلي. مفهوم؟
أنهى المكالمة، ونظر بشرود أمامه، ثم خرج متجهًا إلى سيارته.
وصل إلى المنزل بدقائق معدودة مع ارتفاع رنين هاتفه من مدير أمن شركته.
ـ الصورة بعد خروجها من الشركة يا فندم، بس فيه حاجة وضحت في الكاميرا رغم إنه آخر الشارع، بس الكاميرات الخارجية لقتطتها.
ـ اللي هو؟
ـ العربية وقفت عادي وكأنها بتسألها عن حاجة، بس اللي وضح إن الآنسة مكنتش عايزة تقف، الراجل نزل وحاول يتكلم معاها.
ـ وبعدين؟
ـ هي حاولت تبعد بس معرفش إيه اللي حصل بعد كده ركبت العربية.
ـ تمام… شوف العربية دي تبع مين.
قالها وأغلق الهاتف، ثم صعد لغرفته، قابلته الخادمة.
ـ أدهم بيه، أجهزلك الغدا؟
ـ ماشي.
عند ليلى…
ـ انتوا عايزين مني إيه؟
ـ الفاتورة اللي بتحاولي تجيبي أصلها، تاخدي النسخ اللي معانا وتوريها لأدهم على إنها الحقيقية.
ـ ولو معملتش كده؟
ـ يبقى متلوميش غير نفسك.
ورغم خوفها إلا أنها طالعتها بقوة وعزيمة.
ـ اعمل اللي تقدر عليه.
قالتها وتحركت، وقبل أن تصل للباب، كان قد أعطاها أحدهم مادة مؤثرة.
بمنزل سمية والدة أدهم…
ـ والبنت دي شغالة من امتى؟!
ـ هي مش شغالة يا مدام.
ـ أمال؟
ـ دي متدربة، بقالها شهر.
ـ تجبلي أخبار البنت دي، ومش عايزة تقرب من أدهم.
ـ تحت أمرك يا مدام.
ـ سمية، فيه إيه؟
ـ مفيش…
أشارت للرجل بالمغادرة، بينما هي ارتشفت قهوتها بصمت.
انتبه الآخر وقال:
ـ الموضوع يخص أدهم مش كده؟
ـ مش عايز يسمعني مهما حاولت، شايفني الأم اللي سبته واتجوزت.
ـ ومش دي الحقيقة.
بمنزل أدهم…
خرج من غرفة الرياضة يتحدث بهاتفه.
ـ خلاص يا نانا، هعدي يوم الجمعة، حلو كده؟
ـ انت يا واد كبرت على جدتك، تيجي يعني هتيجي؟
ـ حاضر، ممكن أقفل، عرقي نشف قبل الشاور.
ـ ماشي يا حبيبي.
فتح باب غرفته ودلف للداخل ولكنه توقف متجمدًا بمكانه حين وجدها تغفو فوق فراشه بقميص نوم، اقترب من الفراش يتطلع إليها:
ـ ليلى…. إيه اللي جابك هنا، ولابسة ليه كده؟
بمكان آخر…
ـ أيوة يا باشا، كل حاجة تمام، البنت دلوقتي عنده.
ـ اتصل بالجهات المختصة، وقول للجيران زي ما قولت لك.
ـ بس دي فيلا.
ـ أنا هتصرف، المهم عايز الصورة تكون متصدرة الصحف.
ـ تحت أمرك… بس مدام سمية لو عرفت ممكن.
ـ نفذ من غير كلام.