
فتاة لا تعرف شيئًا عن ماضيه، ولا تحاول اقتحام عالمه، ومع ذلك كانت تدخل أفكاره دون استئذان.
وهذا تحديدًا ما كان يثير غضبه..
قطع شروده دلوف السكرتيرة:
ـ مدام سمية الغندور، عايزة تقابل حضرتك.
دلفت والدته ترمق السكرتيرة بنظرة غاضبة:
ـ وسعي، أنا هاخد إذن علشان أقابل ابني.
أشار لها بالانصراف.
ثم اتجه إلى مقعده وجلس خلف مكتبه.
اقتربت والدته منه:
ـ هتفضل كدا لحد امتى يابني؟ انت بتوحشني.
ـ أهلا مدام سمية.
ـ هو أنا يابني مش بصعب عليك؟
رفع عيناه إليها:
ـ ليه معندكيش ولاد غيري؟ بلاش ترسمي دور الحنية دا، مش لايق عليكي.
ـ ادهم لازم تسمعني.
نهض من مكانه وتوقف أمامها:
ـ اسمعك… ياترى انت زمان سمعتيني، لما سبتيني بعيط وروحتي للرجل اللي اخترتيه؟
رد فعل قوي منها، لم يتحرك ولم يغضب، بل رمقها بنظرة خذلان، ثم تراجع بخطوات ثقيلة:
ـ شوفتي يامدام سمية…
في تلك اللحظة:
ـ ادهم بيه، الاجتماع بعد دقايق، وانسة ليلى بتصل بيها مابتردش، أكلم نهلة تحضر مكانها؟
ابعتي رقم ليلى.. وصلي مدام سمية لباب الشركة.
ظلت تنظر إليه والدته بصمت موجع، ثم استدارت وغادرت الشركة.
بعد دقائق…
وصلت ليلى إلى الشركة وهي تلتقط أنفاسها، بعدما اضطرت إلى تغيير طريقها بسبب ازدحام الطريق.. بينما سامح ظل ينتظرها بالخارج.
دخلت قسم الحسابات، فاستقبلتها مريم بابتسامة.
ـ أخيرًا يا بنتي! أدهم بيه سأل عليكي مرتين.
اتسعت عينا ليلى.
ـ مرتين؟! يا مصيبتي! هو الاجتماع بدأ؟
ـ لسه، بس شكله مش على بعضه.
وضعت ليلى حقيبتها على مكتبها، وأخرجت الملف.
ـ طب أنا هطلع له حالًا.
وقبل أن تتحرك، استوقفها موظف من قسم الحسابات.
ـ آنسة ليلى، ممكن دقيقة؟
التفتت إليه.
ـ خير؟
ـ فيه ظرف وصل لكِ من بره الشركة، والموظف اللي سلمه قال إنه مهم.
ناولها ظرفًا أبيض صغيرًا.
نظرت إليه باستغراب.
ـ من مين؟
ـ معرفش، هو سلمه للاستقبال ومشي.
تناولت الظرف، وقلبته بين يديها.
لم يكن عليه اسم مرسل، ولا أي بيانات.
شعرت بانقباض خفيف في صدرها، لكنها فتحته بحذر.
كان بداخله ورقة صغيرة، كُتبت عليها جملة واحدة:
«لو عايزة تعرفي مين اللي ورطك في موضوع الفاتورة، انزلي الجراج لوحدك بعد الشغل.»
توقفت أنفاسها للحظة.
عادت تقرأ الجملة مرة ثانية، ثم ثالثة.
من الذي كتبها؟
وكيف عرف أنها تعمل على مراجعة الفاتورة؟
هل كان أحدهم يحاول مساعدتها، أم أن الأمر فخ؟
رفعت رأسها، فوجدت مريم تنظر إليها بفضول.
ـ فيه إيه؟
أخفت ليلى الورقة داخل الملف.
ـ مفيش، مجرد ورقة شكلها وصلت بالغلط.
لم ترد أن تقلق مريم، لكنها لم تستطع تجاهل الخوف الذي بدأ يتسلل إلى قلبها.
وفي تلك اللحظة، رن هاتفها برسالة من رقم مجهول.
«لو عايزة تفضلي في الشركة، انسي الفاتورة دي.»
تجمدت أصابعها حول الهاتف.
لم تعد المسألة مجرد مستندات ناقصة أو موظف يرفض التعاون.
هناك شخص يراقبها، ويعرف ما تفعله، ويحاول إجبارها على التراجع.
وللمرة الأولى، شعرت أن الأمر أكبر منها فعلًا.
لكنها تذكرت كلمات أدهم في الاجتماع: طالما عندك دليل، اتكلمي.
أغلقت هاتفها، وحملت الملف.
ـ مريم، لو أستاذ أدهم سأل عليَّ، قوليله إني في مكتبه.
ـ ما إنتِ رايحة له فعلًا!
ابتسمت ليلى بتوتر.
ـ أيوه، بس المرة دي مش هروح له بإيدي فاضية.
في مكتب أدهم…
كانت ليلى تقف أمامه، تضع الملف فوق مكتبه، بينما تحاول إخفاء الاضطراب الذي لم تستطع السيطرة عليه تمامًا.
رفع أدهم عينيه إليها.
ـ اتأخرتي.
ـ أنا آسفة يا فندم، كان عندي امتحان والطريق كان زحمة.
ـ كان ممكن تتصلي.
ـ مع حضرتك حق.
لاحظ أنها لا تنظر إليه كما اعتادت، وأن أصابعها تضغط على حافة الملف بقوة.
قطب حاجبيه.
ـ فيه إيه؟
رفعت عينيها إليه بسرعة.
ـ مفيش يا فندم.
ـ ليلى.
مجرد نطقه لاسمها جعلها تتوقف عن محاولة إخفاء ارتباكها.
ـ نعم؟
ـ أنا سألتك فيه إيه.
ترددت، ثم أخرجت الورقة من حقيبتها ووضعتها أمامه.
قرأها مرة واحدة.
ولم يتغير وجهه، لكن أصابعه توقفت فوق الورقة.
رفع عينيه إليها.
ـ مين اداكي دي؟
ـ مش عارفة. وصلت لي في ظرف من بره الشركة.
ـ وإنتِ خبّيتيها ليه؟
ارتبكت وقالت:
ـ أنا لسه مستلمياها من شوية، وكنت جاية لحضرتك علشان الاجتماع.
ظل ينظر إليها، ثم التقط هاتفه واتصل بالأمن.
ـ عايز أعرف مين دخل الاستقبال وسلّم ظرفًا للآنسة ليلى من عشر دقايق. راجعوا الكاميرات، ومحدش يمسح أي تسجيل.
أنهى المكالمة، ثم عاد إليها.
ـ حد كلمك أو ضغط عليك قبل كده؟
ترددت.
كان بإمكانها أن تنكر، وأن تتظاهر بأنها قادرة على التعامل مع الأمر وحدها، لكنها تذكرت الرسالة التي وصلتها.
أخرجت هاتفها، وأرته إياها.
قرأ أدهم الرسالة.
هذه المرة، تغيرت ملامحه بوضوح.
لم يكن الغضب موجهًا إليها، بل إلى الشخص الذي تجرأ على الضغط عليها داخل شركته.
وضع الهاتف فوق المكتب ببطء.
ـ من اللحظة دي، أي رسالة توصلك من رقم مجهول، أو أي حد يحاول يكلمك بخصوص الفاتورة، تبلغيني فورًا.
أومأت ليلى.
ـ حاضر.
ـ ومش هتنزلي الجراج لوحدك، ولا هتقابلي أي حد يطلب منك تقابليه بعيد عن الشركة. مفهوم؟
رفعت عينيها إليه.
ـ مفهوم يا فندم.
سكت لحظة، ثم لاحظ شحوب وجهها.
ـ إنتِ خايفة؟
حاولت الابتسام.
ـ شوية.
ـ شوية؟
خفضت عينيها، ثم قالت بصوت خافت:
ـ أنا مش متعودة على الحاجات دي يا فندم. أنا كل اللي عايزاه إني أخلص دراستي وأشتغل، مش عايزة أدخل في مشاكل مع حد.
للمرة الأولى، لم يجد أدهم ردًا جاهزًا.
كان يرى الخوف في عينيها، لكنه رأى معه شيئًا آخر؛ إحساسًا بالعجز تحاول إخفاءه حتى لا تبدو ضعيفة.
نهض من مقعده، ووقف أمامها.
ـ بصي لي يا ليلى.
رفعت عينيها إليه.
ـ طول ما إنتِ ماشية صح، مش مطلوب منك تخافي من حد. واللي عنده حاجة يثبتها، يواجهنا بيها بدل الرسائل المجهولة دي.
ابتلعت ريقها.
ـ حاضر.
ثم أضافت بتردد:
ـ شكرًا يا فندم.
أدار وجهه بعيدًا عنها، وكأنه لا يريدها أن ترى أثر كلماتها عليه.
ـ متشكرينيش. دي شركتي، ومش هسمح لحد يستخدمها علشان يضغط على موظف عندي.
أومأت، لكنها لاحظت أنه لم يقل لها إن الأمر لا يعنيه، ولم يطلب منها أن تتوقف عن التفكير فيه، كما فعل حين أخبرته سابقًا بأنها تخاف من عصبيته.
بل كان يحاول طمأنتها بطريقته الخاصة.
وذلك، لسبب لم تستطع تفسيره، جعل قلبها يهدأ قليلًا.
بعد انتهاء الاجتماع…
خرجت ليلى من قاعة الاجتماعات، تحمل ملفها، بينما كان أحد موظفي الإدارة يسير إلى جوارها.
كان شابًا في أواخر العشرينيات، اسمه كريم، وقد حضر الاجتماع ممثلًا عن الإدارة المالية.
التفت إليها مبتسمًا.
ـ بصراحة، أنا اتفاجئت من شغلك النهارده. مكنتش متوقع إن متدربة لسه في الجامعة تلاحظ فرق الأرقام ده.
ابتسمت ليلى بخجل.
ـ شكرًا، بس أنا لسه بتعلم.
ـ واضح إنك هتعملي شغل كويس هنا. لو احتجتي أي حاجة في الحسابات، أنا موجود.
ـ متشكرة جدًا.
كان أدهم يخرج من القاعة في تلك اللحظة.
توقفت عيناه عند المشهد أمامه.
كريم يبتسم.. وليلى تضحك بخفة.
ضحكة لم يسمعها أدهم منذ دقائق، حين كانت تقف أمامه شاحبة الوجه، تخفي خوفها خلف كلمات قليلة.
لم يكن في المشهد ما يستحق الانزعاج.
